"பிரதமர் மோடியின் கோரிக்கைகள் அரசின் தோல்விக்கான சான்று" – ராகுல் காந்தி கடும் விமர்சனம்

மத்திய அரசின் தவறான கொள்கைகளால் நாடு மோசமான நிலைக்குத் தள்ளப்பட்டுள்ளதாகவும், பிரதமர் மோடி முன்வைக்கும் கோரிக்கைகள் அவரது ஆட்சியின் தோல்வியையே காட்டுகின்றன என்றும் மக்களவை எதிர்க்கட்சித் தலைவர் ராகுல் காந்தி விமர்சித்துள்ளார்.

இது தொடர்பாக அவர் தனது ‘எக்ஸ்’ சமூக வலைதளப் பக்கத்தில் வெளியிட்டுள்ள பதிவில், பொதுமக்கள் சில தியாகங்களைச் செய்ய வேண்டும் என்று பிரதமர் மோடி வேண்டுகோள் விடுத்துள்ளதைச் சுட்டிக்காட்டியுள்ளார். தங்கம் வாங்க வேண்டாம், வெளிநாடுகளுக்குச் செல்வதைத் தவிர்க்கவும், பெட்ரோல் பயன்பாட்டைக் குறைத்துக் கொள்ளவும், உரம் மற்றும் சமையல் எண்ணெய் பயன்பாட்டைக் குறைக்கவும் பிரதமர் வலியுறுத்தியுள்ளதை ராகுல் காந்தி வரிசைப்படுத்தியுள்ளார். மேலும், மெட்ரோ ரயில்களைப் பயன்படுத்தவும், வீட்டிலிருந்தே வேலை செய்யவும் பிரதமர் கூறியிருப்பது வெறும் போதனைகள் அல்ல, அவை மத்திய அரசின் நிர்வாகத் தோல்வியின் வெளிப்பாடுகள் என்று அவர் குறிப்பிட்டுள்ளார்.

கடந்த 12 ஆண்டுகால ஆட்சியில் நாட்டை இத்தகைய இக்கட்டான நிலைக்கு பிரதமர் கொண்டு வந்துள்ளதாக ராகுல் காந்தி குற்றம் சாட்டியுள்ளார். மக்கள் எதை வாங்க வேண்டும், எதை வாங்கக்கூடாது, எங்கே செல்ல வேண்டும், எங்கே செல்லக்கூடாது என்று அறிவுறுத்தும் நிலைக்கு நாடு தள்ளப்பட்டிருப்பதை அவர் வேதனையுடன் பகிர்ந்துள்ளார்.

ஒவ்வொரு முறையும் அரசு தனது தோல்விகளுக்கும், பிரச்சினைகளுக்கும் பொறுப்பேற்பதற்குப் பதிலாக, அந்தப் பொறுப்பை சாமானிய மக்கள் மீது சுமத்தித் தப்பித்துக் கொள்ளப் பார்ப்பதாக ராகுல் காந்தி தனது பதிவில் கடுமையாகச் சாடியுள்ளார். பொருளாதார நெருக்கடிகளை மறைக்க மக்கள் மீது தியாகங்களைப் புகுத்துவது நியாயமற்றது என்றும் அவர் தெரிவித்துள்ளார்.