மெக்சிகோ நகரம் பூமிக்குள் மூழ்குகிறது: நாசா விடுத்துள்ள அதிர்ச்சித் தகவல்

உலகின் மிகப்பெரிய மற்றும் அதிக மக்கள் தொகை கொண்ட நகரங்களில் ஒன்றான மெக்சிகோ நகரம், கற்பனை செய்ய முடியாத வேகத்தில் பூமிக்குள் மூழ்கி வருவதாக விண்வெளி ஆராய்ச்சி நிறுவனமான நாசா (NASA) எச்சரிக்கை விடுத்துள்ளது. நாசாவின் அதிநவீன மற்றும் சக்திவாய்ந்த ரேடார் அமைப்புகள் மூலம் எடுக்கப்பட்ட சமீபத்திய செயற்கைக்கோள் புகைப்படங்கள், இந்த அபாயகரமான நிலையை உறுதிப்படுத்தியுள்ளன. சுமார் 22 மில்லியன் மக்கள் வசிக்கும் இந்த பிரம்மாண்டமான நகரம், இயற்கையோடு மனிதன் மேற்கொண்டு வரும் போராட்டத்தின் விளைவாக பெரும் சவாலை எதிர்கொண்டுள்ளது.

இந்த நிலச்சரிவிற்கான முதன்மையான காரணம் நகரின் குடிநீர் தேவையாகும். மெக்சிகோ நகரத்தின் 60 சதவீத குடிநீர் தேவை, நகருக்கு அடியில் அமைந்துள்ள ஒரு பழமையான நிலத்தடி நீர் தடாகத்தின் (Aquifer) மூலமே பூர்த்தி செய்யப்படுகிறது. மக்கள் தொகை பெருக்கத்திற்கு ஏற்ப நிலத்தடி நீர் மிக அதிக அளவில் உறிஞ்சப்படுவதால், நிலப்பரப்பு சமநிலையை இழந்து உள்வாங்கத் தொடங்கியுள்ளது. இது தவிர, களிமண் நிறைந்த மென்மையான மண்ணின் மீது அமைக்கப்பட்டுள்ள பிரம்மாண்டமான கட்டிடங்கள் மற்றும் கனரக உள்கட்டமைப்புகளின் அதீத எடையும் நிலச்சரிவின் தீவிரத்தை மேலும் அதிகரிப்பதாக ஆய்வாளர்கள் சுட்டிக்காட்டுகின்றனர்.

நாசா மற்றும் இந்திய விண்வெளி ஆய்வு நிறுவனமான இஸ்ரோ (ISRO) இணைந்து உருவாக்கிய செயற்கைக்கோள் தரவுகளின்படி, கடந்த 2025 அக்டோபர் முதல் 2026 ஜனவரி வரையிலான குறுகிய காலப்பகுதியில் அதிர்ச்சிகரமான மாற்றங்கள் நிகழ்ந்துள்ளன. நகரின் சில பகுதிகள் ஆண்டுக்கு சுமார் 9.5 அங்குல வேகத்தில் மூழ்கி வருவது கண்டறியப்பட்டுள்ளது. இதன் விளைவாக நகரின் முக்கிய வீதிகளில் பெரும் பிளவுகள் ஏற்படுவதுடன், கட்டிடங்கள் சரிந்து விழும் அபாயமும், ரயில் போக்குவரத்து கட்டமைப்புகள் செயலிழக்கும் சூழலும் உருவாகியுள்ளது. குறிப்பாக, பெனிட்டோ ஜுவாரஸ் சர்வதேச விமான நிலையம் மற்றும் நகரின் அடையாளமான 'சுதந்திர தேவதை' நினைவுச் சின்னம் அமைந்துள்ள பகுதிகள் மிக மோசமாக பாதிக்கப்பட்டுள்ளன.

1910-ஆம் ஆண்டு கட்டப்பட்ட புகழ்பெற்ற 'சுதந்திர தேவதை' நினைவுச் சின்னம், இந்நகரம் மூழ்கி வருவதற்கான ஒரு நேரடி சாட்சியாக மாறியுள்ளது. சிலையின் தரைப்பகுதி பூமிக்குள் இறங்கியதன் காரணமாக, அதன் உயரத்தை ஈடுகட்ட இதுவரை 14 கூடுதல் படிக்கட்டுகள் சிலையின் கீழ்ப்பகுதியில் சேர்க்கப்பட்டுள்ளன என்பது குறிப்பிடத்தக்கது. இதே நிலை நீடித்தால், மெக்சிகோ நகரம் விரைவில் 'டே ஜீரோ' (Day Zero) எனப்படும் நிலையை எட்டும் என்று விஞ்ஞானிகள் அஞ்சுகின்றனர். அதாவது, நீர் முற்றிலும் தீர்ந்துபோய், ஒட்டுமொத்த நகரமும் குடிநீர் திவால் நிலையை சந்திக்கும் ஒரு பேரழிவு காலம் வெகு தொலைவில் இல்லை என எச்சரிக்கப்பட்டுள்ளது.