ஸ்காட்லாந்து முதல்வராக ஜோன் ஸ்வினி மீண்டும் தேர்வு: நாடாளுமன்ற வாக்கெடுப்பில் வெற்றி

ஸ்கொட்டிஷ் தேசியக் கட்சியின் (SNP) தலைவர் ஜோன் ஸ்வினி, ஸ்காட்லாந்து நாடாளுமன்றத்தில் நடைபெற்ற மூன்று சுற்று வாக்கெடுப்புகளின் பின்னர் மீண்டும் அந்நாட்டின் முதல் அமைச்சராக (First Minister) அதிகாரப்பூர்வமாகத் தேர்ந்தெடுக்கப்பட்டுள்ளார். செவ்வாய்க்கிழமை நடைபெற்ற இந்த விறுவிறுப்பான நாடாளுமன்ற வாக்கெடுப்பில் ஐந்து எதிர்க்கட்சி வேட்பாளர்களைத் தோற்கடித்து, ஜோன் ஸ்வினி 56 வாக்குகளைப் பெற்றுத் தனது வெற்றியை உறுதி செய்தார். இதனைத் தொடர்ந்து, பிரித்தானிய மன்னர் சார்லஸினால் வழங்கப்படும் அரச ஆணைப் பத்திரத்தின் (Royal Warrant) மூலம் அவர் உத்தியோகபூர்வமாக நியமிக்கப்பட்டு, புதன்கிழமை நீதிமன்றத்தில் (Court of Session) நடைபெற்ற விழாவில் முறைப்படி பதவியேற்றுக்கொண்டார்.

தனது தேர்தல் வெற்றிக்குப் பின்னர் நாடாளுமன்றத்தில் உரையாற்றிய ஜோன் ஸ்வினி, "நான் ஸ்காட்லாந்து மக்கள் அனைவருக்குமான முதலமைச்சராகச் செயற்படுவேன்" என உறுதியளித்துள்ளார். மேலும், இந்த புதிய நாடாளுமன்றக் கூட்டத்தொடரில் மக்களின் வாழ்வாதாரச் செலவின நெருக்கடியைக் குறைப்பது, தேசிய சுகாதாரச் சேவையை (NHS) மேம்படுத்துவது மற்றும் நாட்டின் பொருளாதாரத்தை வலுப்படுத்துவது ஆகியவற்றுக்கே தனது அரசாங்கம் முன்னுரிமை அளிக்கும் என்றும் அவர் தனது உரையில் குறிப்பிட்டார்.

கடந்த மே 7 ஆம் திகதி நடைபெற்ற பொதுத்தேர்தலில், மொத்தம் உள்ள 129 நாடாளுமன்ற ஆசனங்களில் ஜோன் ஸ்வினியின் 'எஸ்பிஎன்' கட்சி 58 ஆசனங்களை வென்று மிகப்பெரிய கட்சியாக உருவெடுத்தது. எனினும், தனித்து பெரும்பான்மையை நிரூபிக்கத் தேவையான 65 ஆசனங்களை அக்கட்சியினால் பெற முடியாமல் போன நிலையிலேயே, புதிய முதல்வரைத் தேர்ந்தெடுப்பதற்கான இந்த நாடாளுமன்ற வாக்கெடுப்பு நடத்தப்பட்டது. கடந்த 1999 ஆம் ஆண்டு முதல் ஸ்காட்லாந்து நாடாளுமன்ற உறுப்பினராக இருந்து வரும் ஜோன் ஸ்வினி, 2024 ஆம் ஆண்டு முதன்முறையாகக் கட்சித் தலைமையை ஏற்று அரசாங்கத்தை வழிநடத்தத் தொடங்கிய நிலையில், தற்போது இரண்டாவது முறையாக நாட்டின் ஆட்சிப் பொறுப்பை ஏற்றுள்ளார் என்பது குறிப்பிடத்தக்கது.