ஈரான் - அமெரிக்கா பதற்றம்: ஹார்முஸ் ஜலசந்தியில் இந்திய போர்க்கப்பல்கள் குவிப்பு

ஈரான் மற்றும் அமெரிக்கா ஆகிய நாடுகளுக்கு இடையே புதிய ஒப்பந்தம் எதுவும் ஏற்படுவதில் தொடர்ந்து இழுபறி நீடித்து வருகிறது. இதன் காரணமாக, ஹார்முஸ் ஜலசந்தி பகுதியில் அமெரிக்க போர்க்கப்பல்கள் முற்றுகையிட்டுள்ளன. இதற்குப் பதிலடியாக, சர்வதேச சரக்கு கப்பல் போக்குவரத்துக்கு ஈரான் தொடர்ந்து இடையூறுகளை ஏற்படுத்தி வருகிறது. இந்த இருதரப்பு மோதல் மாதக்கணக்கில் நீடித்து வருவதால், வளைகுடா நாடுகளில் இருந்து உலக நாடுகளுக்குச் செல்லும் கச்சா எண்ணெய் விநியோகம் கடுமையாகப் பாதிக்கப்பட்டுள்ளது. இதன் விளைவாக, சர்வதேச சந்தையில் பெட்ரோலியப் பொருட்களின் விலை தொடர்ந்து உயர்ந்து வருகிறது.

தற்போது நிலவி வரும் சர்வதேச அரசியல் சூழ்நிலையில், ரஷ்யாவிடம் இருந்து கச்சா எண்ணெய் இறக்குமதி செய்வதற்கு அமெரிக்கா தற்காலிகமாக விலக்கு அளித்துள்ளது. எனினும், இந்தச் சலுகை நீண்ட காலத்திற்கு நீடிப்பதற்கான வாய்ப்புகள் மிகவும் குறைவு என்பதை இந்தியா உணர்ந்துள்ளது. எனவே, நாட்டின் எரிசக்தி தேவையைப் பூர்த்தி செய்வதற்காக, வளைகுடா நாடுகளில் இருந்து தொடர்ந்து தடையின்றி கச்சா எண்ணெய் மற்றும் சமையல் எரிவாயு (LPG) ஆகியவற்றை இறக்குமதி செய்வதற்கான மாற்று வியூகங்களை இந்திய அரசு தீவிரமாக வகுத்து வருகிறது.

பாதுகாப்பை பலப்படுத்தும் இந்தியா

ஈரான் மற்றும் அமெரிக்கப் படைகளின் நடமாட்டத்தால் பதற்றம் நிறைந்துள்ள ஹார்முஸ் ஜலசந்தி பகுதியை, இந்திய டேங்கர் கப்பல்கள் எவ்வித ஆபத்துகளும் இன்றி பாதுகாப்பாகக் கடந்து செல்வதற்கான நடவடிக்கைகள் முடுக்கிவிடப்பட்டுள்ளன. இதற்காக, அப்பகுதியில் ரோந்து பணியில் ஈடுபட்டுள்ள இந்திய போர்க்கப்பல்களின் எண்ணிக்கை தற்போது இரண்டு மடங்காக உயர்த்தப்பட்டுள்ளது. இந்த அதிநவீன இந்திய போர்க்கப்பல்கள், ஹார்முஸ் ஜலசந்தியை இந்திய டேங்கர் கப்பல்கள் கடந்து செல்லும்போது அவற்றுக்குத் தேவையான முழுமையான பாதுகாப்பு அரணை வழங்கும் எனத் தெரிவிக்கப்பட்டுள்ளது.

மத்திய அரசின் இறுதி ஒப்புதலுக்காகக் காத்திருப்பு:

இந்திய வணிகக் கப்பல்களின் பாதுகாப்பை உறுதி செய்வதற்கான இந்த விரிவான திட்டங்கள் அனைத்தும் தற்போது இறுதி செய்யப்பட்டுள்ளன. மத்திய அரசு அதிகாரப்பூர்வமாக இதற்கான இறுதி ஒப்புதலை அளித்தவுடன், இந்திய டேங்கர் கப்பல்கள் கூடுதல் பாதுகாப்புடன் ஹார்முஸ் ஜலசந்தி வழியாகத் தங்களின் பயணத்தைத் தொடங்கும் எனக் கூறப்படுபகிறது.

இந்த அசாதாரணமான பாதுகாப்புத் திட்டம் முழுமையான வெற்றி பெற்றால், சர்வதேசப் பதற்றங்களுக்கு மத்தியிலும் வளைகுடா நாடுகளில் இருந்து இந்தியாவுக்குத் தேவையான கச்சா எண்ணெய் மற்றும் எல்.பி.ஜி எரிவாயுவை எவ்வித தடையுமின்றி பாதுகாப்பாகக் கொண்டு வர முடியும் என எரிசக்தி துறை வல்லுநர்கள் நம்பிக்கை தெரிவித்துள்ளனர்.