தடகள வீரர்களின் வலிகளைப் பேசும் ‘அங்கீகாரம்’: டிரெய்லர் வெளியாகி வரவேற்பு!

பிரபல தயாரிப்பாளர் கேஜெஆர் ராஜேஷ் முதன்முறையாக கதாநாயகனாக அவதாரம் எடுத்துள்ள ‘அங்கீகாரம்’ திரைப்படத்தின் மீதான எதிர்பார்ப்பு தற்போது அதிகரித்துள்ளது. ஜேபி. தென்பாதியான் இயக்கத்தில் உருவாகியுள்ள இத்திரைப்படத்தில் சிந்தூரி விஸ்வநாத், விஜி வெங்கடேஷ், ஆண்டனி, ரங்கராஜ் பாண்டே, மன்சூர் அலிகான் மற்றும் மோகன்ராம் உள்ளிட்ட பல முன்னணி நட்சத்திரங்கள் முக்கிய கதாபாத்திரங்களில் நடித்துள்ளனர். ஸ்வஸ்திக் விஷன்ஸ் சார்பில் பிரசாந்த், அஜித் பாஸ்கர் மற்றும் அருண் முருகன் ஆகியோர் இணைந்து இந்தப் படத்தை பிரம்மாண்டமாகத் தயாரித்துள்ளனர்.

இத்திரைப்படத்திற்கு முன்னணி இசையமைப்பாளர் ஜிப்ரான் இசையமைக்க, ஏ. விஸ்வநாத் ஒளிப்பதிவு பணிகளை மேற்கொண்டுள்ளார். படத்தின் விறுவிறுப்பான டிரெய்லர் அண்மையில் வெளியாகி, ரசிகர்களிடையே பெரும் பாராட்டைப் பெற்று வருகிறது. ஒரு தயாரிப்பாளராக அறியப்பட்ட கேஜெஆர் ராஜேஷ், இதில் நாயகனாக எத்தகைய நடிப்பை வெளிப்படுத்தியுள்ளார் என்பதைப் பார்க்க ரசிகர்கள் ஆவலுடன் காத்திருக்கின்றனர்.

விளையாட்டுத் துறையைப் பின்னணியாகக் கொண்டு உருவாகியுள்ள இந்தப் படம் குறித்துப் படக்குழுவினர் சில சுவாரசியமான தகவல்களைப் பகிர்ந்துள்ளனர். தடகள விளையாட்டை மையமாகக் கொண்டுள்ள இத்திரைப்படம், மைதானத்தில் வீரர்கள் சந்திக்கும் சவால்கள், அவர்களுக்குப் பின்னால் இருக்கும் இன்னல்கள் மற்றும் விளையாட்டுத் துறையில் நிலவும் சில கசப்பான உண்மைகளைப் பற்றிப் பேசவுள்ளது.

படத்தின் உண்மைத்தன்மையை உறுதிப்படுத்தும் விதமாக, சுமார் 75 லட்சம் ரூபாய் செலவில் மிகப்பிரமாண்டமான நீதிமன்ற வளாக செட் அமைக்கப்பட்டு முக்கியக் காட்சிகள் படமாக்கப்பட்டுள்ளன. தற்போது இறுதிக்கட்டப் பணிகள் விறுவிறுப்பாக நடைபெற்று வரும் நிலையில், படத்தின் வெளியீட்டு தேதி குறித்த அதிகாரப்பூர்வ அறிவிப்பு விரைவில் வெளியாகும் என எதிர்பார்க்கப்படுகிறது.