ஸ்ரீலங்கன் ஏர்லைன்ஸ் தொலைபேசி இலக்கம் குறித்த தவறு: பொலிஸார் வெளியிட்ட முக்கிய விளக்கம்

ஸ்ரீலங்கன் ஏர்லைன்ஸ் நிறுவனத்தின் உத்தியோகபூர்வ தொலைபேசி இலக்கம், தவறுதலாக மோசடி இலக்கங்களின் பட்டியலில் சேர்க்கப்பட்டமை தொடர்பில் பொலிஸ் ஊடகப் பிரிவு விசேட விளக்கமளித்துள்ளது. கடந்த ஏப்ரல் மாதம் 23ஆம் திகதி தொலைபேசி செயலி மோசடிகள் குறித்து பொலிஸாரால் வெளியிடப்பட்ட அறிக்கையில், 011-7771979 என்ற இலக்கம் தவறுதலாக உள்ளீர்க்கப்பட்டிருந்தது.

உண்மையில் இந்த இலக்கம் ஸ்ரீலங்கன் ஏர்லைன்ஸ் நிறுவனத்தின் உத்தியோகபூர்வ மற்றும் சட்டபூர்வமான தொடர்பு இலக்கமாகும். இதனை மோசடிப் பட்டியலில் இருந்து நீக்குமாறு அந்த நிறுவனத்தின் தலைமை நிர்வாக அதிகாரி விடுத்த கோரிக்கையைத் தொடர்ந்து, பொலிஸார் தற்போது புதிய அறிவித்தலை வெளியிட்டுள்ளனர். அதன்படி, குறித்த இலக்கம் பாதுகாப்பானது என்றும், அது மோசடி நடவடிக்கைகளுடன் தொடர்புடையது அல்ல என்றும் தெளிவுபடுத்தப்பட்டுள்ளது.

இருப்பினும், ஸ்ரீலங்கன் ஏர்லைன்ஸ் நிறுவனத்தின் பெயரைப் பயன்படுத்தி முன்னெடுக்கப்படும் பாரிய இணைய மோசடி குறித்து பொலிஸார் பொதுமக்களை எச்சரித்துள்ளனர். மோசடியாளர்கள் 'WhatsApp' ஊடாக ஸ்ரீலங்கன் ஏர்லைன்ஸ் பிரதிநிதிகள் போலத் தொடர்புகொண்டு, SriLankan.apk என்ற செயலியை நிறுவுமாறு கோருகின்றனர். இந்த மோசடிச் செயலியைப் பரப்புவதற்காக srilankan[.]wuozgo[.]cc, srilankan[.]vaco[.]cc, மற்றும் srilankan[.]krgo[.]cc ஆகிய மூன்று போலி இணையதளங்கள் பயன்படுத்தப்படுவது விசாரணையில் கண்டறியப்பட்டுள்ளது.

இந்தச் செயலியானது பயனர்களின் வங்கி கணக்கு விவரங்கள், கடவுச்சொற்கள் (Passwords) மற்றும் கிரெடிட்/டெபிட் கார்டு தகவல்களைத் திருடுவதற்காக வடிவமைக்கப்பட்ட ஒரு ஆபத்தான மால்வேர் (Malware) என அடையாளம் காணப்பட்டுள்ளது. இதனைத் தரவிறக்கம் செய்வதன் மூலம், மோசடியாளர்கள் பயனர்களின் தொலைபேசியைத் தூரத்தில் இருந்து இயக்கவும் (Remote Access), சட்டவிரோத வங்கிப் பரிமாற்றங்களை மேற்கொள்ளவும் வாய்ப்புள்ளது.

அத்துடன், இந்த மோசடி நடவடிக்கையுடன் தொடர்புடையதாகக் கருதப்படும் 077-4558361, 074-1142208, 077-5791209, மற்றும் 074-3268200 ஆகிய தொலைபேசி இலக்கங்கள் குறித்தும் பொலிஸார் எச்சரித்துள்ளனர். உடனடி நிதி ஆதாயம் தருவதாகக் கூறி பொதுமக்களை ஏமாற்றும் இவ்வாறான கும்பல்கள் குறித்து விழிப்புடன் இருக்குமாறும், அறிமுகமில்லாத நபர்கள் அனுப்பும் செயலிகளைத் தரவிறக்கம் செய்ய வேண்டாம் என்றும் பொலிஸார் மீண்டும் வலியுறுத்தியுள்ளனர்.