ஆபத்தான தெரு நாய்களை கருணை கொலை செய்யலாம்: உச்ச நீதிமன்றம் அதிரடி உத்தரவு!

வெறிநோய் (ரேபிஸ்) மற்றும் குணப்படுத்த முடியாத கொடிய நோய்களால் பாதிக்கப்பட்டு, பொதுமக்களுக்கு ஆபத்தாக விளங்கும் தெரு நாய்களைக் கருணை கொலை செய்ய அனுமதி அளித்து உச்ச நீதிமன்றம் மிக முக்கியமான அதிரடி உத்தரவைப் பிறப்பித்துள்ளது. டெல்லியில் தெரு நாய்கள் கடித்ததால் சிறுவர்கள் ரேபிஸ் தொற்றால் பாதிக்கப்பட்டதாக வெளியான செய்திகளின் அடிப்படையில், உச்ச நீதிமன்றம் இந்த விவகாரத்தை தாமாக முன்வந்து வழக்காகப் பதிவு செய்து விசாரித்து வந்தது.

இந்த வழக்கினை நீதிபதிகள் விக்ரம் நாத், சந்தீப் மேத்தா மற்றும் அன்ஜாரியா ஆகியோர் அடங்கிய அமர்வு விசாரித்து நேற்று தீர்ப்பளித்தது. அப்போது, தெரு நாய்கள் தொடர்பாகக் கடந்த ஆண்டு நவம்பர் மாதம் உச்ச நீதிமன்றம் பிறப்பித்த உத்தரவை திரும்பப் பெறக் கோரி தாக்கல் செய்யப்பட்ட பல்வேறு மனுக்களை நீதிபதிகள் நிராகரித்தனர். முந்தைய உத்தரவுகள் எக்காரணம் கொண்டும் திரும்பப் பெறப்பட மாட்டாது என்று திட்டவட்டமாகத் தெரிவித்த நீதிபதிகள், விலங்குகள் நல வாரியத்தின் விதிகளை மாநில அரசுகள் அனைத்தும் முறையாகவும் தீவிரமாகவும் அமல்படுத்த வேண்டும் என்று உத்தரவிட்டனர்.

தீவிரப்படுத்தப்படும் கருத்தடை மற்றும் விழிப்புணர்வு

பொதுமக்களின் பாதுகாப்பை உறுதி செய்யும் நோக்கில், நாட்டின் ஒவ்வொரு மாவட்டத்திலும் விலங்குகள் கருத்தடை மையங்கள் கட்டாயமாக அமைக்கப்பட வேண்டும் என்று நீதிமன்றம் அறிவுறுத்தியுள்ளது. குறிப்பாக, தெரு நாய்களின் எண்ணிக்கை அதிகமாகக் காணப்படும் பகுதிகளில் இந்த கருத்தடை மையங்களின் எண்ணிக்கையை மேலும் அதிகரிக்க வேண்டும். இதுமட்டுமன்றி, அனைத்து அரசு மற்றும் தனியார் மருத்துவமனைகளிலும் ரேபிஸ் நோய்க்கான தடுப்பூசிகள் எப்போதும் போதிய அளவில் இருப்பில் வைக்கப்பட வேண்டும் என்றும் நீதிபதிகள் உத்தரவிட்டனர்.

மேலும், நாய்க்கடிக்கு ஆளானால் செய்ய வேண்டிய முதலுதவி சிகிச்சைகள் மற்றும் அதன் தீவிரத்தன்மை குறித்து பள்ளி, கல்லூரி மாணவ, மாணவியரிடையே பரவலான விழிப்புணர்வை ஏற்படுத்த வேண்டியது அவசியம் என்று நீதிமன்றம் சுட்டிக்காட்டியுள்ளது.

பொது இடங்களில் கட்டுப்பாடு மற்றும் பாதுகாப்பு

ரயில் நிலையங்கள், பேருந்து நிலையங்கள், விளையாட்டு அரங்குகள் மற்றும் மருத்துவமனைகள் போன்ற பொது மக்கள் அதிகம் கூடும் இடங்களில் தெரு நாய்கள் நுழைவதைத் தடுக்க உரிய நடவடிக்கைகள் எடுக்கப்பட வேண்டும். இதுதொடர்பாக ஏற்கனவே பிறப்பிக்கப்பட்ட பாதுகாப்பு உத்தரவுகளை உள்ளாட்சி அமைப்புகளும் அதிகாரிகளும் கண்டிப்புடன் பின்பற்ற வேண்டும் என்று அறிவுறுத்தப்பட்டுள்ளது.

இறுதியாக, வெறிநோய் மற்றும் குணப்படுத்த முடியாத நோய்களால் பாதிக்கப்பட்டு, மனிதர்களுக்கு ஆபத்தாக மாறும் நாய்களைக் கருணை கொலை செய்ய அரசு அதிகாரிகளுக்கு அனுமதி வழங்கப்பட்டுள்ளது. இத்தகைய உச்ச நீதிமன்ற உத்தரவுகளை முறைப்படி அமல்படுத்தும் அரசு ஊழியர்கள் மற்றும் அதிகாரிகள் மீது எந்தவிதமான வழக்குகளும் பதிவு செய்யப்படக் கூடாது என்றும் நீதிபதிகள் தங்களது தீர்ப்பில் தெளிவுபடுத்தியுள்ளனர்.