ரஜினி – கமல் இணையும் பிரம்மாண்ட படம்: முக்கிய கதாபாத்திரத்தில் ஒப்பந்தமானார் த்ரிஷா!

தமிழ் சினிமாவின் இரு பெரும் துருவங்களான சூப்பர் ஸ்டார் ரஜினிகாந்த் மற்றும் உலக நாயகன் கமல்ஹாசன் ஆகியோர் நீண்ட இடைவேளைக்குப் பிறகு ஒரே திரையில் இணையவுள்ள செய்தி ஏற்கனவே ரசிகர்களிடையே பெரும் எதிர்பார்ப்பை ஏற்படுத்தியுள்ளது. நெல்சன் திலீப்குமார் இயக்கத்தில் உருவாகவுள்ள இத்திரைப்படத்தின் அதிகாரப்பூர்வ அறிவிப்பு மற்றும் ப்ரோமோ வீடியோ சமீபத்தில் வெளியாகி சமூக வலைதளங்களில் வைரலானது. ரெட் ஜெயன்ட் மூவிஸ் நிறுவனம் மிக பிரம்மாண்டமான முறையில் தயாரிக்கும் இப்படத்திற்கு அனிருத் இசையமைக்க, ராஜீவ் மேனன் ஒளிப்பதிவு பணிகளை மேற்கொள்ளவுள்ளனர்.

இந்நிலையில், இப்படத்தில் ஒரு முக்கியமான மற்றும் வலிமையான கதாபாத்திரத்தில் நடிக்க நடிகை த்ரிஷா ஒப்பந்தமாகியுள்ளதாக நம்பத்தகுந்த தகவல்கள் வெளியாகியுள்ளன. த்ரிஷா ஏற்கனவே ரஜினிகாந்துடன் ‘பேட்ட’ படத்திலும், கமல்ஹாசனுடன் ‘மன்மதன் அம்பு’ மற்றும் ‘தூங்காவனம்’ ஆகிய படங்களிலும் நாயகியாக நடித்துள்ளார். தற்போது தமிழ் சினிமாவின் இந்த இரண்டு ஜாம்பவான்களும் இணையும் வரலாற்றுச் சிறப்புமிக்க திரைப்படத்தில் த்ரிஷா இணைந்திருப்பது படத்தின் மீதான எதிர்பார்ப்பை மேலும் அதிகரித்துள்ளது.

தற்போது ரஜினிகாந்த் நடிப்பில் உருவாகியுள்ள ‘ஜெயிலர் 2’ படத்தின் பணிகள் இறுதிக்கட்டத்தில் உள்ளன. இப்படம் வெளியான பிறகு, ரஜினி - கமல் இணையும் புதிய படத்தின் படப்பிடிப்பை தொடங்க இயக்குனர் நெல்சன் திட்டமிட்டுள்ளார். இதற்கான முதற்கட்டப் பணிகள் தற்போது மும்முரமாக நடைபெற்று வருகின்றன. ‘ஜெயிலர் 2’ படத்தின் விளம்பரப் பணிகள் அனைத்தும் நிறைவடைந்தவுடன், த்ரிஷா இப்படத்தில் இணைந்தது குறித்த அதிகாரப்பூர்வ அறிவிப்பை படக்குழு வெளியிடும் என்று எதிர்பார்க்கப்படுகிறது.