சீனா சென்றடைந்தார் விளாடிமிர் புதின்: உலக அரசியலில் புதிய திருப்பத்தை ஏற்படுத்தும் இரு நாள் இராஜதந்திர பயணம்!

ரஷ்ய அதிபர் விளாடிமிர் புதின் இரண்டு நாள் உத்தியோகப்பூர்வ பயணமாக செவ்வாய்க்கிழமை (19) சீனா சென்றடைந்தார். தற்போதைய பதற்றமான உலகளாவிய சூழ்நிலைகளுக்கு மத்தியில், அவரது இந்த வருகை உலக அரசியல் அரங்கில் ஒரு முக்கிய மைல்கல்லைக் குறிக்கிறது. குறிப்பாக, அமெரிக்க அதிபர் டொனால்ட் டிரம்பின் சீனப் பயணம் முடிவடைந்து ஒரு வாரத்திற்கும் குறைவான காலத்திலேயே ரஷ்ய அதிபர் இந்த முக்கிய பயணத்தை மேற்கொண்டுள்ளது சர்வதேச கவனிப்பைப் பெற்றுள்ளது.

சீன அதிபர் ஷி ஜின்பிங்கின் அதிகாரப்பூர்வ அழைப்பின் பேரில், அவரது பழைய நண்பரான ரஷ்ய அதிபர் விளாடிமிர் புதின் பெய்ஜிங் வந்தடைந்தார். அங்கு அவருக்கு சீன நிர்வாகத்தின் சார்பில் உற்சாகமான மற்றும் சிறப்பான வரவேற்பு அளிக்கப்பட்டது. இது ரஷ்ய அதிபர் புதினின் 25வது சீனப் பயணமாகும் என்பது குறிப்பிடத்தக்கது.

உலகின் மிகச் சக்திவாய்ந்த இரு நாட்டுத் தலைவர்களான டிரம்ப் மற்றும் புதின் ஆகியோரை ஒரே வாரத்தில் தனது நாட்டிற்கு அழைத்து பேச்சுவார்த்தை நடத்தியதன் மூலம், தற்போதைய உலகளாவிய நெருக்கடிக்கு மத்தியில் உலக அரசியலில் சீனா ஒரு நிலையான, பலம் வாய்ந்த மற்றும் நம்பகமான சக்தியாக உருவெடுத்து வருவதை பெய்ஜிங் நிர்வாகம் உலகிற்கு நிரூபிக்க முயற்சிக்கிறது. இந்த இராஜதந்திர சந்திப்பின் மூலம், எந்தவொரு கடுமையான சூழ்நிலையையும் தாங்கக்கூடிய இரு நாடுகளுக்கும் இடையிலான உடைக்க முடியாத இருதரப்பு உறவை உலகிற்கு வெளிப்படுத்துவதும் ஒரு முக்கிய நோக்கமாகும்.

மேற்கத்திய நாடுகளின் கடுமையான பொருளாதாரத் தடைகளுக்கு மத்தியில், சீனாவுடனான தனது எரிசக்தி உறவுகளை ரஷ்யா மேலும் வலுப்படுத்துவதும் இந்தப் பயணத்தின் முக்கிய இலக்குகளில் ஒன்றாகும். அதற்கமைய, நீண்ட காலமாகத் திட்டமிடப்பட்டுள்ள 'பவர் ஆஃப் சைபீரியா 2' (Power of Siberia 2) எரிவாயுக் குழாய் திட்டத்திற்கு இரு நாடுகளின் தலைவர்களும் தங்களது சிறப்பு கவனத்தைச் செலுத்துவார்கள் என்று கூறப்படுகிறது.

இந்தப் பயணத்தின் போது, இருதரப்பு உறவுகள் மற்றும் பரஸ்பர முக்கியத்துவம் வாய்ந்த சர்வதேச மற்றும் பிராந்தியப் பிரச்சினைகள் குறித்து இரு தலைவர்களும் விரிவான கருத்துப் பரிமாற்றங்களை மேற்கொள்வார்கள் என்று சீன வெளியுறவு அமைச்சகம் அதிகாரப்பூர்வமாகத் தெரிவிவித்துள்ளது.