டெக்சாஸில் கர்ப்பிணி மனைவியைக் கொன்றதாகக் குற்றம் சாட்டப்பட்ட நபர் இத்தாலியில் கைது

அமெரிக்காவின் டெக்சாஸ் மாகாணத்தில் தனது கர்ப்பிணி மனைவியைக் கொலை செய்ததாகக் குற்றம் சாட்டப்பட்ட நபர் ஒருவர், அந்நாட்டின் நீதிமன்ற விசாரணையிலிருந்து தப்பி இத்தாலிக்குச் சென்ற நிலையில் கைது செய்யப்பட்டுள்ளார். லீ கில்லி (Lee Gilley) எனப்படும் அந்த 39 வயது நபர், தனது காலில் பொருத்தப்பட்டிருந்த ஜிபிஎஸ் கண்காணிப்பு கருவியை (Ankle monitor) அறுத்தெறிந்துவிட்டு, போலி கடவுச்சீட்டு மற்றும் ஆவணங்களுடன் மிலன் நகருக்குச் சென்றுள்ளார். அங்கு எல்லைப் பாதுகாப்புப் படையினரால் அவர் தடுத்து நிறுத்தப்பட்டபோது, தான் நிரபராதி என்றும் தன்னை மீண்டும் அமெரிக்காவிற்கு அனுப்ப வேண்டாம் என்றும் அவர் இத்தாலிய அதிகாரிகளிடம் கோரிக்கை விடுத்துள்ளார்.

2024 ஆம் ஆண்டு தனது மனைவி மற்றும் பிறக்காத குழந்தையின் மரணத்திற்கு லீ கில்லி மீது கொலைக் குற்றம் சுமத்தப்பட்டது. இது தொடர்பான வழக்கு விசாரணை சில வாரங்களில் தொடங்கவிருந்த நிலையில் அவர் வெளிநாட்டுக்குத் தப்பியோடியுள்ளார். திங்கள்கிழமை அன்று இத்தாலியின் டுரின் (Turin) நகரில் உள்ள நீதிமன்றத்தில் ஆஜர்படுத்தப்பட்ட கில்லி, அமெரிக்காவின் நீதி அமைப்பின் மீது தனக்கு நம்பிக்கை இல்லை என்று தெரிவித்தார். மரண தண்டனைக்கு எதிராகக் கடுமையான நிலைப்பாட்டைக் கொண்டுள்ள இத்தாலியில், தனக்கு புகலிடம் வழங்க வேண்டும் என்றும் அவர் முறையிட்டார். தான் செய்த ஒரே குற்றம் மரண தண்டனையிலிருந்து தப்பிக்க முயன்றது மட்டுமே என்று அவர் நீதிபதியிடம் வாதிட்டார்.

இந்த நீதிமன்ற விசாரணை நாடுகடத்துவதற்கான நடவடிக்கை அல்ல, மாறாக இத்தாலிய சட்டப்படி அவரது கைது செல்லுபடியாகும் என்பதை உறுதிப்படுத்துவதற்காகவே நடைபெற்றது. நீதிமன்றம் அவரது கைதை உறுதி செய்துள்ளதால், அமெரிக்கா அவரை நாடுகடத்தக் கோரும் வரை அவர் இத்தாலிய சிறையில் அடைக்கப்படுவார். டெக்சாஸ் வழக்கறிஞர்கள் இந்த வழக்கில் அவருக்கு மரண தண்டனையைக் கோருவார்களா அல்லது அவரை நாடுகடத்த முறைப்படி விண்ணப்பிப்பார்களா என்பது இன்னும் தெளிவாகத் தெரியவில்லை. இது தொடர்பாக ஹாரிஸ் கவுண்டி (Harris County) அரசு வழக்கறிஞர் அலுவலகம் கருத்து தெரிவிக்க மறுத்துவிட்டது.