’ஜனநாயகன்’ படத்தின் ஓடிடி உரிமை: கடும் போட்டியில் முன்னணி நிறுவனங்கள்!

ஹெச்.வினோத் இயக்கத்தில் தளபதி விஜய் நடித்துள்ள ‘ஜனநாயகன்’ திரைப்படம், ஆரம்பம் முதலே பல்வேறு சவால்களைச் சந்தித்து வந்த நிலையில், தற்போது ஓடிடி தளங்களுக்கு இடையே பெரும் எதிர்பார்ப்பை ஏற்படுத்தியுள்ளது. முதலில் ஜனவரி 9-ம் தேதி திரைக்கு வரவிருந்த இப்படம், தணிக்கைக் குழுவில் ஏற்பட்ட சில சிக்கல்கள் காரணமாக திட்டமிட்டபடி வெளியாகவில்லை. இந்தத் தாமதத்தினால் படத்தின் ஓடிடி உரிம ஒப்பந்தமும் ரத்து செய்யப்பட்டதுடன், படம் இணையத்தில் கசிந்த விவகாரமும் படக்குழுவினருக்குப் பெரும் பின்னடைவாக அமைந்தது.

இருப்பினும், சமீபத்தில் நடந்து முடிந்த தமிழக சட்டப்பேரவைத் தேர்தலில் தமிழக வெற்றிக் கழகம் மிகப்பெரிய வெற்றியைப் பெற்று, விஜய் தமிழக முதல்வராகப் பதவியேற்றுள்ளார். இந்த அரசியல் அதிரடி மாற்றம் ‘ஜனநாயகன்’ படத்திற்கான எதிர்பார்ப்பை பல மடங்கு அதிகரித்துள்ளது. விஜய்க்கு மக்கள் மத்தியில் கிடைத்துள்ள அமோக ஆதரவு காரணமாக, இப்படத்தின் தமிழக விநியோக உரிமை பழைய விலையிலேயே தொடரும் என்றும், விநியோகஸ்தர்கள் மத்தியில் மீண்டும் ஆர்வம் அதிகரித்துள்ளதாகவும் கூறப்படுகிறது.

குறிப்பாக, ஓடிடி தளங்களுக்கு இடையிலான போட்டி இப்போது உச்சத்தை எட்டியுள்ளது. முன்னதாக அமேசான் நிறுவனம் ‘ஜனநாயகன்’ படத்திற்காக செய்திருந்த ஒப்பந்தத்தை ரத்து செய்திருந்த நிலையில், தற்போது விஜய் முதல்வராகப் பொறுப்பேற்றுள்ள சூழலில், பல்வேறு முன்னணி ஓடிடி நிறுவனங்கள் இப்படத்தின் உரிமையைக் கைப்பற்றப் போட்டி போட்டு வருகின்றன. படத்தின் டிஜிட்டல் உரிமையை மிகப்பெரிய விலைக்கு வாங்க நிறுவனங்கள் ஆர்வம் காட்டி வருவதால், முடங்கிக் கிடந்த ‘ஜனநாயகன்’ படக்குழுவினர் தற்போது மிகுந்த உற்சாகத்தில் உள்ளனர். விரைவில் இது குறித்த அதிகாரப்பூர்வ அறிவிப்பு வெளியாகும் என எதிர்பார்க்கப்படுகிறது.