'கருப்பு' திரைப்படத்தின் பிரம்மாண்ட வெற்றி: தியேட்டர்களில் சாமி ஆடுபவர்களுக்கு சூர்யா வைத்த உருக்கமான வேண்டுகோள்!

நடிகர் சூர்யாவின் நடிப்பில் பெரிதும் எதிர்பார்க்கப்பட்ட 'கருப்பு' திரைப்படம் கடந்த வெள்ளிக்கிழமை உலகமெங்கும் திரையரங்குகளில் வெளியானது. ரிலீசுக்கு முன்பாக பல்வேறு சட்டப் போராட்டங்களையும் தடைகளையும் எதிர்கொண்ட இந்தத் திரைப்படம், தற்போது அனைத்து சவால்களையும் தாண்டி திரையரங்குகளில் வெற்றிகரமாக ஓடிக்கொண்டிருக்கிறது. ரசிகர்களிடையே படத்திற்கு கிடைத்துள்ள ஏகோபித்த வரவேற்பு, வசூலிலும் எதிரொலித்து வருகிறது.

படம் வெளியான முதல் மூன்று நாட்களிலேயே உலகளவில் 147 கோடி ரூபாய் வசூல் செய்துள்ளதாக படக்குழுவினர் அதிகாரப்பூர்வமாக அறிவித்துள்ளனர். சூர்யாவின் திரைப்பயணத்தில் மிகக் குறுகிய காலத்தில் இந்த அளவிற்கான பிரம்மாண்ட வசூலை ஈட்டிய திரைப்படமாக 'கருப்பு' உருவெடுத்துள்ளது. இதனால் படக்குழுவினரும், சூர்யாவின் ரசிகர்களும் பெரும் மகிழ்ச்சியில் ஆழ்ந்துள்ளனர்.

திரையரங்குகளில் படம் பார்த்த ரசிகர்கள் பலர், படத்தில் வரும் கருப்பசாமி கதாபாத்திரத்தையும் அதன் தீவிரத்தையும் கண்டு பரவசமடைந்து, தியேட்டரிலேயே சாமி ஆடி வரும் வீடியோக்கள் கடந்த சில தினங்களாக இணையத்தில் காட்டுத்தீயாய் பரவி வருகின்றன. ஆன்மீக ரீதியாகவும் உணர்வுப்பூர்வமாகவும் ரசிகர்கள் இந்தத் திரைப்படத்தோடு தங்களை இணைத்துக் கொண்டுள்ளதையே இந்த வீடியோக்கள் காட்டுகின்றன.

இந்நிலையில், இணையத்தில் வைரலாகி வரும் இந்த சம்பவங்கள் குறித்து நடிகர் சூர்யா தனது சமூக வலைத்தளப் பக்கத்தில் ஒரு முக்கியமான வேண்டுகோளை முன்வைத்துள்ளார். அதில், "கருப்பு திரைப்படத்திற்கு ஏற்பட்ட தடைகளைத் தாண்டி முழு ஆதரவு தந்து, வெற்றிகரமாகத் திரையிட்டுவரும் என் அன்பிற்குரிய திரையரங்க உரிமையாளர்கள், ஊழியர்கள் மற்றும் வெளியீட்டிற்கு உறுதுணையாக இருந்த தயாரிப்பாளர் சங்க நிர்வாகிகள், விநியாகஸ்தர் சங்க நிர்வாகிகள் அனைவருக்கும் எனது மனமார்ந்த நன்றிகள்!" என்று முதலில் தனது நன்றியைத் தெரிவித்துள்ளார்.

தொடர்ந்து தியேட்டர்களில் நடக்கும் சம்பவங்கள் குறித்துப் பேசிய அவர், "மேலும், திரையரங்குகளில் கருப்பசாமியைக் கண்டு பரவசமடைபவர்களுக்கு, உரிய முதலுதவி வழங்கி உதவுமாறு அன்புடன் கேட்டுக்கொள்கிறேன். அந்த நேரத்தில் மற்றவர்கள் அதை வீடியோ எடுப்பதைத் தவிர்க்குமாறு அறிவுருத்த அன்போடு வேண்டுகிறேன்" என்று பதிவிட்டுள்ளார். உணர்ச்சிவசப்படும் ரசிகர்களின் பாதுகாப்பிற்கு முக்கியத்துவம் கொடுக்க வேண்டும் என்றும், அவர்களின் தனியுரிமையை மதித்து வீடியோ எடுப்பதைத் தவிர்க்க வேண்டும் என்றும் சூர்யா விடுத்துள்ள இந்த முதிர்ச்சியான வேண்டுகோள் தற்போது சமூக வலைத்தளங்களில் பாராட்டுகளைப் பெற்று வருகிறது.