பாகிஸ்தானில் மீண்டும் வன்முறை: வாகனத்தில் சென்ற மதகுருவை சுட்டுக்கொன்ற மர்ம நபர்கள்.

பாகிஸ்தானின் கைபர் பக்துன்க்வா மாகாணத்தில் நேற்று அரங்கேறிய துப்பாக்கிச் சூடு சம்பவத்தில், அந்நாட்டின் முன்னணி மதகுருமார்களில் ஒருவரான மௌலானா முகமது இத்ரீஸ் கொடூரமான முறையில் படுகொலை செய்யப்பட்டார். சர்சத்தா மாவட்டத்தின் உட்மான்சாய் பகுதியில் இடம்பெற்ற இந்தத் தாக்குதல் நாடு முழுவதும் பெரும் அதிர்ச்சியை ஏற்படுத்தியுள்ளது.

சம்பவம் நடந்த செவ்வாய்க்கிழமை அன்று, மௌலானா முகமது இத்ரீஸ் பலத்த பொலிஸ் பாதுகாப்போடு தனது வாகனத்தில் பயணித்துக்கொண்டிருந்தார். அப்போது அங்கு திடீரென மற்றொரு வாகனத்தில் வந்த இனந்தெரியாத ஆயுததாரிகள், மதகுருவின் வாகனத்தை இலக்கு வைத்து சரமாரியாக துப்பாக்கிச் சூடு நடத்தினர். இந்தத் தாக்குதலில் படுகாயமடைந்த மௌலானா இத்ரீஸ் சம்பவ இடத்திலேயே உயிரிழந்ததாக அந்நாட்டு ஊடகங்கள் உறுதிப்படுத்தியுள்ளன.

மேலும், இந்தத் தாக்குதலின் போது பாதுகாப்பு பணியில் ஈடுபட்டிருந்த இரண்டு பொலிஸ் உத்தியோகத்தர்களும் படுகாயமடைந்துள்ளனர். அவர்கள் தற்போது சிகிச்சைக்காக மருத்துவமனையில் அனுமதிக்கப்பட்டுள்ளனர். உயிரிழந்த மதகுருவின் உடல் பிரேத பரிசோதனைக்காக கொண்டு செல்லப்பட்டுள்ள நிலையில், தாக்குதல் நடத்திய நபர்களைக் கண்டறிய பொலிஸார் தீவிர விசாரணைகளை முடுக்கிவிட்டுள்ளனர்.

இந்தத் துப்பாக்கிச் சூடு சம்பவத்திற்கு இதுவரை எந்தவொரு தீவிரவாத அமைப்பும் பொறுப்பேற்கவில்லை. மாகாணத்தின் பாதுகாப்புச் சூழல் குறித்து கவலை தெரிவித்துள்ள அதிகாரிகள், தப்பியோடிய குற்றவாளிகளைத் தேடும் பணியில் ஈடுபட்டு வருகின்றனர். இந்தச் சம்பவம் அப்பகுதியில் பெரும் பதற்றத்தை ஏற்படுத்தியுள்ளது.