கொச்சி ஐபிஎல் சர்ச்சை: 'சசி தரூர் மிரட்டினார், கட்டாயப்படுத்தி கையெழுத்து வாங்கப்பட்டேன்' - லலித் மோடியின் பகீர் வாக்குமூலம்

இந்தியன் பிரீமியர் லீக் (ஐபிஎல்) கிரிக்கெட் தொடரின் ஆரம்ப காலத்தில் பெரும் புயலைக் கிளப்பிய 'கொச்சி டஸ்கர்ஸ் கேரளா' அணி தொடர்பான சர்ச்சை மீண்டும் விஸ்வரூபம் எடுத்துள்ளது. அந்த அணிக்கு ஒப்புதல் வழங்குவதற்காக, அப்போதைய மத்திய அமைச்சர் சசி தரூர் தன்னை தொலைபேசியில் மிரட்டியதாகவும், பிசிசிஐயின் அழுத்தத்தால் அந்த ஒப்பந்தத்தில் கட்டாயத்தின் பேரில் கையெழுத்திட்டதாகவும் ஐபிஎல் முன்னாள் தலைவர் லலித் மோடி அதிர்ச்சி தகவலை வெளியிட்டுள்ளார்.

2011-ஆம் ஆண்டு ஐபிஎல் தொடரில், மஹேலா ஜெயவர்த்தனே தலைமையில் கொச்சி டஸ்கர்ஸ் கேரளா அணி களமிறங்கியது. ரவீந்திர ஜடேஜா, பிரண்டன் மெக்கல்லம், முத்தையா முரளிதரன் போன்ற நட்சத்திர வீரர்கள் இடம்பெற்றிருந்தும், அந்த அணி ஒரே ஒரு தொடரில் மட்டுமே பங்கேற்றது. உரிமையாளர்களுக்கு இடையிலான கருத்து வேறுபாடு மற்றும் பிசிசிஐ-க்கு செலுத்த வேண்டிய வங்கி உத்தரவாதத் தொகையைச் செலுத்தத் தவறியது போன்ற காரணங்களால், அந்த அணியின் உரிமத்தை பிசிசிஐ அதிரடியாக ரத்து செய்தது. இதை எதிர்த்து அணி உரிமையாளர்கள் நடத்திய சட்டப் போராட்டத்தில், பிசிசிஐயிடம் இருந்து பல நூறு கோடி ரூபாயை இழப்பீடாகப் பெற்றனர்.

இந்நிலையில், அந்த அணியின் உருவாக்கம் மற்றும் அதன் பின்னணியில் இருந்த அரசியல் அழுத்தங்கள் குறித்து லலித் மோடி தற்போது விரிவாகப் பேசியுள்ளார். அவர் தனது குற்றச்சாட்டில், 'கொச்சி அணியின் கூட்டமைப்பு சுமார் 333 மில்லியன் டாலர் ஏலத்தில் உரிமையைப் பெற்றதும், அதன் உரிமையாளர் கட்டமைப்பு குறித்து நான் தீவிரமான கவலைகளை எழுப்பினேன். கூட்டமைப்பு உறுப்பினர்கள் கூட்டத்தில் சுனந்தா புஷ்கரைத் தவிர மற்ற அனைவரும் இருந்தனர். அப்போது, 'யார் இந்த சுனந்தா புஷ்கர்? மற்றவர்கள் கோடிக்கணக்கில் முதலீடு செய்யும்போது, இவருக்கு மட்டும் எப்படி இலவசப் பங்குகள்?' எனக் கேள்வி எழுப்பினேன்' என்று குறிப்பிட்டுள்ளார்.

அவர் மேலும் கூறுகையில், 'நான் இந்தக் கேள்விகளை எழுப்பியதைத் தொடர்ந்து, அப்போதைய வெளியுறவுத்துறை இணை அமைச்சர் சசி தரூர் என்னை தொலைபேசியில் அழைத்தார். 'லலித், சுனந்தா புஷ்கர் பற்றி எதுவும் பேச வேண்டாம். மீறினால், நாளை காலை உன் வீட்டில் சோதனை நடக்கும்' என்று நேரடியாக மிரட்டல் விடுத்தார். அதற்கு நான், 'நீங்கள் இந்திய வெளியுறவு அமைச்சர், ஆனால் இதை என்னிடம் சொல்ல உங்களுக்குத் துணிச்சல் இருக்கக் கூடாது' என்று கூறி இணைப்பைத் துண்டித்தேன்' என அந்த உரையாடலை லலித் மோடி விவரித்துள்ளார்.

தனது எதிர்ப்பையும் மீறி, அப்போதைய பிசிசிஐ தலைவர் சஷாங்க் மனோகர் தன்னை ஒப்பந்தத்தில் கையெழுத்திடுமாறு நிர்ப்பந்தித்ததாகவும் லலித் மோடி குற்றம்சாட்டினார். 'நான் அந்த ஒப்பந்தத்தில் கையெழுத்திட்டேன். ஆனால், 'பிசிசிஐ தலைவரின் வற்புறுத்தலின் பேரில் கையெழுத்திடுகிறேன்' என அந்த ஆவணத்திலேயே எனது எதிர்ப்பைப் பதிவு செய்தேன். இது ஒரு கட்டாயத்தின் பேரிலான கையெழுத்து என்பதை ஆவணப்படுத்தினேன்' என்றும் அவர் தெரிவித்துள்ளார்.

லலித் மோடியின் இந்தக் குற்றச்சாட்டுகள் வெளியான காலகட்டத்தில், அது பெரும் அரசியல் புயலைக் கிளப்பியது. அதன் விளைவாக, சசி தரூர் தனது அமைச்சர் பதவியை ராஜினாமா செய்ய நேர்ந்தது. பின்னர், சுனந்தா புஷ்கரும் தனது பங்குகளைத் துறந்தார். ஐபிஎல் தொடரில் வணிகமும், அரசியலும் எந்த அளவிற்குப் பின்னிப்பிணைந்திருந்தன என்பதற்கு இந்தச் சம்பவம் ஒரு முக்கிய உதாரணமாக இன்றும் பார்க்கப்படுகிறது.