ஐபிஎல்-லில் புதிய வரலாறு: ரிஷப் பந்த்தின் சாதனையை முறியடித்து அசத்திய 15 வயது இளம் புயல் வைபவ் சூர்யவன்ஷி!

நடப்பு ஐபிஎல் தொடரில் ராஜஸ்தான் ராயல்ஸ் அணியின் இளம் நட்சத்திர ஆட்டக்காரர் வைபவ் சூர்யவன்ஷி, மிகக் குறைந்த வயதில் 500 மற்றும் அதற்கு அதிகமாக ரன்கள் குவித்த முதல் வீரர் என்ற வரலாற்றுச் சாதனையைப் படைத்துள்ளார். ஜெய்ப்பூரில் நடைபெற்ற லக்னோ அணிக்கு எதிரான ஆட்டத்தில் ராஜஸ்தான் ராயல்ஸ் அணி 7 விக்கெட் வித்தியாசத்தில் அபார வெற்றி பெற்றது. இந்த ஆட்டத்தில் தொடக்க வீரராகக் களம் இறங்கி ருத்ரதாண்டவம் ஆடிய வைபவ் சூர்யவன்ஷி, வெறும் 38 பந்துகளில் 10 சிக்ஸர்கள் மற்றும் 7 பவுண்டரிகளுடன் 93 ரன்களை விளாசித் தள்ளினார். இதன் மூலம், ஐபிஎல் வரலாற்றிலேயே மிக இளம் வயதில் (15 வயது) ஒரு சீசனில் 500 ரன்களைக் கடந்த வீரர் என்ற பெருமையை அவர் தன்வசப்படுத்தியுள்ளார்.

இதற்கு முன்பு, கடந்த 2018ஆம் ஆண்டு டெல்லி டேர்டெவில்ஸ் அணிக்காக விளையாடிய ரிஷப் பந்த், தனது 20ஆவது வயதில் 500 ரன்களைக் கடந்ததே முந்தைய சாதனையாக இருந்தது. தற்போது 15 வயதே ஆன வைபவ் சூர்யவன்ஷி, ரிஷப் பந்த்தின் இந்த நீண்ட நாள் சாதனையைத் தகர்த்தெறிந்துள்ளார். அதுமட்டுமின்றி, ஒரு ஐபிஎல் தொடரில் 500-க்கும் மேல் ரன்கள் குவித்த வீரர்களின் பட்டியலில், சர்வதேச ஜாம்பவான்களைப் பின்னுக்குத் தள்ளி 236.3 என்ற மிக அதிகப்படியான ஸ்டிரைக் ரேட்டுடன் வைபவ் சூர்யவன்ஷி முதலிடத்தைப் பிடித்துள்ளார்.

இந்த அதிவேக ரன் குவிப்புப் பட்டியலில், 2019இல் 204.8 ஸ்டிரைக் ரேட்டுடன் ஆந்த்ரே ரஸ்ஸல் இரண்டாம் இடத்திலும், 2026இல் 202.0 ஸ்டிரைக் ரேட்டுடன் அபிஷேக் சர்மா மூன்றாம் இடத்திலும் உள்ளனர். அவர்களைத் தொடர்ந்து, 2025இல் நிக்கோலஸ் பூரன் (196.2), 2024இல் டிராவிஸ் ஹெட் (191.2) மற்றும் 2014இல் கிளென் மேக்ஸ்வெல் (187.7) ஆகியோர் அடுத்தடுத்த இடங்களில் வரிசையிடுகின்றனர்.

சிக்ஸர் மழையில் நனைந்த ஐபிஎல்: கிறிஸ் கெயில் சாதனைக்கு ஆபத்து?

ரன்களில் மட்டுமின்றி சிக்ஸர்களைப் பறக்கவிடுவதிலும் இந்த 15 வயது இளம் வீரர் நடப்புத் தொடரில் புதிய மைல்கல்லை எட்டியுள்ளார். ஒரே ஐபிஎல் தொடரில் அதிக சிக்ஸர்கள் விளாசிய வீரர்கள் வரிசையில், இந்த ஆண்டில் இதுவரை 53 சிக்ஸர்களை அடித்து வைபவ் சூர்யவன்ஷி இரண்டாம் இடத்தைப் பிடித்துள்ளார். இப்பட்டியலில் 'யுனிவர்ஸ் பாஸ்' கிறிஸ் கெயில், கடந்த 2012 சீசனில் 59 சிக்ஸர்களுடன் இன்னும் முதலிடத்தில் நீடிக்கிறார்.

இவர்களைத் தொடர்ந்து, 2019 சீசனில் 52 சிக்ஸர்கள் அடித்த ஆந்த்ரே ரஸ்ஸல் மூன்றாம் இடத்திலும், 2013இல் 51 சிக்ஸர்கள் அடித்த கிறிஸ் கெயில் நான்காம் இடத்திலும் உள்ளனர். மேலும், ஜாஸ் பட்லர் (2022இல் 45 சிக்ஸர்கள்), கிறிஸ் கெயில் (2011இல் 44 சிக்ஸர்கள்) மற்றும் அபிஷேக் சர்மா (2024இல் 42 சிக்ஸர்கள்) ஆகியோர் அடுத்தடுத்த இடங்களைப் பிடித்துள்ளனர். நடப்புத் தொடரில் இன்னும் போட்டிகள் மீதமிருப்பதால், கிறிஸ் கெயிலின் 59 சிக்ஸர்கள் என்ற வரலாற்றுச் சாதனையையும் வைபவ் சூர்யவன்ஷி முறியடிக்க அதிக வாய்ப்புள்ளதாக கிரிக்கெட் விமர்சகர்கள் கருதுகின்றனர்.