ஐரோப்பா மற்றும் ஆசிய எஃகுக்கான இறக்குமதி வரிகளை ஏமாற்றிய விவகாரம்: $19 மில்லியன் அபராதம் செலுத்த 2 கனடா நிறுவனங்கள் சம்மதம்

அமெரிக்காவிற்கு இறக்குமதி செய்யப்பட்ட பிளாட்-ரோல்டு எஃகு (flat-rolled steel) தயாரிப்புகளுக்கான முறையான வரிகளைச் செலுத்தாமல் ஏமாற்றிய குற்றச்சாட்டைத் தீர்ப்பதற்காக, இரண்டு கனடா நாட்டு எஃகு நிறுவனங்கள் $19 மில்லியன் அபராதத் தொகையைச் செலுத்த ஒப்புக்கொண்டுள்ளதாக அமெரிக்க நீதித்துறை (U.S. Justice Department) புதன்கிழமை தெரிவித்துள்ளது. ஐரோப்பா மற்றும் ஆசிய நாடுகளில் தயாரிக்கப்பட்ட இந்த எஃகுப் பொருட்களுக்கு, அவர்கள் வேண்டுமென்றே வரி ஏய்ப்பு செய்ததாகக் குற்றம் சாட்டப்பட்டுள்ளது.

இதுதொடர்பாக அமெரிக்க நீதித்துறை வெளியிட்டுள்ள செய்திக்குறிப்பில், Farjess Inc. மற்றும் Royal Canadian Steel Inc. ஆகிய நிறுவனங்கள், அவற்றின் பகுதி உரிமையாளரும் தலைவருமான Feroz Jessani உடன் இணைந்து, மே 2019 முதல் ஜனவரி 2025 வரையிலான காலகட்டத்தில் இந்த முறைகேட்டில் ஈடுபட்டதாகக் கூறப்பட்டுள்ளது. இந்த எஃகு பொருட்கள் சீனா, இந்தோனேசியா, இத்தாலி, துருக்கி அல்லது வியட்நாம் ஆகிய நாடுகளில் இருந்து பெறப்பட்டவை என்று தெரிந்திருந்தும், அவை கனடா மற்றும் அமெரிக்காவில் தயாரிக்கப்பட்டவை என அவர்கள் தவறாகக் சித்தரித்துள்ளனர்.

இந்த இரண்டு கனடா நிறுவனங்களின் வரி ஏய்ப்பை, ஒரு தரகர் (broker) விசில்ப்ளோயர் (whistleblower) சட்டத்தின் கீழ் அதிகாரிகளுக்கு அடையாளம் காட்டினார். அமெரிக்காவின் ஃபால்ஸ் க்ளைம்ஸ் ஆக்ட் (False Claims Act) விதியின் கீழ், அரசுக்கு எதிராக நடக்கும் மோசடிகள் குறித்து தனிநபர்கள் வழக்குத் தொடர முடியும். இந்தத் தீர்வறிக்கையின் ஒரு பகுதியாக, அந்தத் தரகருக்கு $3.61 மில்லியன் வெகுமதியாக வழங்கப்பட உள்ளது.

இதுகுறித்து அமெரிக்க உதவி அட்டர்னி ஜெனரல் Brett A. Shumate கூறுகையில், "பொதுவாக நமது தேசிய நலன்களையும், குறிப்பாக அமெரிக்க எஃகுத் தொழிலையும் பாதுகாப்பதில் இறக்குமதி வரிகள் முக்கியப் பங்கு வகிக்கின்றன. இந்த நாட்டிற்குள் இறக்குமதி செய்யப்படும் எஃகு தயாரிப்புகளுக்கான வரிகளை மோசடியாக ஏமாற்றுபவர்கள் எவராயினும், அவர்களை நீதித்துறை தீவிரமாகப் பின்தொடர்ந்து சட்டத்தின் முன் நிறுத்தும்," என்று எச்சரித்துள்ளார்.

கனடா-அமெரிக்கா-மெக்சிகோ வர்த்தக ஒப்பந்தத்தின்படி (Canada-U.S.-Mexico Agreement), குறிப்பிட்ட விதிகளுக்கு உட்பட்ட எஃகு இறக்குமதிக்கு எவ்வித கட்டணமும் விதிக்கப்படுவதில்லை. இதைப் பயன்படுத்தியே அந்த நிறுவனங்கள் அமெரிக்க சுங்க மற்றும் எல்லைப் பாதுகாப்புத் துறையை (U.S. Customs and Border Protection) ஏமாற்றியுள்ளன. இதற்கிடையில், பிப்ரவரி 2025-இல் அமெரிக்க அதிபர் Donald Trump எஃகு மீது 25 சதவீத வரி விதித்தார், பின்னர் அது 50 சதவீதமாக உயர்த்தப்பட்டது குறிப்பிடத்தக்கது.

இந்த அபராதத் தீர்வு ஒரு சாதனை அளவிலான தொகை என்று செய்திக்குறிப்பில் தெரிவிக்கப்பட்டுள்ளது. இதுகுறித்து மிச்சிகனின் கிழக்கு மாவட்டத்திற்கான (Eastern District of Michigan) அமெரிக்க அட்டர்னி Jerome F. Gorgon Jr. கூறுகையில், "எங்கள் எல்லை தான் அமெரிக்கத் தொழில்துறையின் முன்வரிசையாகும். அமெரிக்கா-கனடா இடையிலான நிலவழி வர்த்தகத்தில் சுமார் பாதி அளவு எங்கள் மாவட்டத்தின் வழியாகவே நடக்கிறது. வெளிநாட்டு மோசடி செய்பவர்களிடமிருந்து எங்கள் வணிகங்களைத் தொடர்ந்து பாதுகாப்போம்," என்று Detroit நகரில் தெரிவித்தார்.