வட்டவன் படுகொலை: 39 ஆண்டுகள் கடந்தும் நீதிக்காக ஏங்கும் உறவுகள் - கண்ணீருடன் நினைவேந்தல்

திருகோணமலை மாவட்டம், வெருகல் பிரதேசத்தில் 1985 ஆம் ஆண்டு நடத்தப்பட்ட வட்டவன் கூட்டுப் படுகொலையின் 39 ஆவது ஆண்டு நினைவேந்தல், படுகொலை செய்யப்பட்டவர்களின் உறவுகளால் கண்ணீருடன் அனுஷ்டிக்கப்பட்டது. அப்பகுதியில் உள்ள நினைவிடத்தில் ஒன்றுதிரண்ட மக்கள், தமது அஞ்சலியைச் செலுத்தி உணர்வுபூர்வமாக இந்த நிகழ்வை அனுசரித்தனர்.

இலங்கையின் போர் வரலாற்றில் கிழக்கு மாகாணம் சந்தித்த ஒரு கறுப்பு அத்தியாயமாக வட்டவன் படுகொலை பதிவாகியுள்ளது. 1985 ஜூன் 3 ஆம் திகதி, பாதுகாப்புத் தரப்பினரும் அவர்களுடன் இணைந்த ஆயுதக் குழுக்களும் நடத்தியதாகக் கூறப்படும் தாக்குதலில், ஆரிப்பு, பூநகர், வட்டவன் உள்ளிட்ட பல கிராமங்கள் முற்றாக அழிக்கப்பட்டன. இந்த கோரத் தாக்குதல்களில் இருந்து உயிர் தப்பியவர்கள், இன்றும் அந்த கொடூர நினைவுகளுடன் வாழ்ந்து வருகின்றனர்.

தாக்குதல்களில் இருந்து தங்களைக் காத்துக்கொள்ள மக்கள் காடுகளுக்குள் தப்பி ஓடியபோது, வட்டவன் கிராமத்தில் ஒரே குடும்பத்தைச் சேர்ந்தவர்களும் உறவினர்களுமான பத்துப் பேர் ஒரு வீட்டில் தஞ்சம் புகுந்தனர். எனினும், அந்த வீட்டிற்குள் புகுந்த ஆயுததாரிகள், அங்கு பதுங்கியிருந்த ஒரு கர்ப்பிணித் தாய், இரண்டு சிறுவர்கள், மூன்று பெண்கள் மற்றும் நான்கு ஆண்கள் என அனைவரையும் ஈவிரக்கமின்றிக் கொன்று குவித்தனர். பின்னர், அவர்களது உடல்களை அதே வீட்டில் வைத்து எரித்ததாக சம்பவத்தை நேரில் கண்டவர்கள் வேதனையுடன் குறிப்பிடுகின்றனர்.

சுமார் நான்கு தசாப்தங்கள் கடந்த நிலையிலும், இந்தப் படுகொலைக்கு முறையான விசாரணை நடத்தப்பட்டு நீதி வழங்கப்படாதது பாதிக்கப்பட்ட மக்களின் ஆறாத மனக்குமுறலாக உள்ளது. ஒவ்வொரு ஆண்டும் நடத்தப்படும் இந்த நினைவேந்தல், கொல்லப்பட்ட உறவுகளை நினைவுகூருவதுடன், போர்க்காலக் குற்றங்களுக்குப் பொறுப்புக்கூறல் மற்றும் நீதிக்கான தொடர் போராட்டத்தின் ஒரு வடிவமாகவும் திகழ்கிறது.