கனடாவில் மதுபோதையில் பள்ளிப் பேருந்தைத் திருடி McDonald’s உணவகத்தில் மோதிய நபர் கைது

Toronto நகரில் பள்ளிப் பேருந்து ஒன்றை திருடிய 38 வயது மதிக்கத்தக்க நபர், மதுபோதையில் வாகனம் ஓட்டிச் சென்று Ajax பகுதியில் உள்ள McDonald’s உணவகத்தின் டிரைவ்-த்ரூ (Drive-thru) பகுதியில் மோதி விபத்தை ஏற்படுத்தியதாக Durham காவல்துறையினர் தெரிவித்துள்ளனர். இது தொடர்பான அதிகாரப்பூர்வ செய்திக்குறிப்பை காவல்துறையினர் வியாழக்கிழமை வெளியிட்டனர்.

கடந்த மே 11-ஆம் தேதி இரவு 11:30 மணியளவில், Taunton Road West மற்றும் Westney Road North சந்திப்பு பகுதியில் வாகனம் ஒன்று தாறுமாறாகச் செல்வதாகக் கிடைத்த புகாரைத் தொடர்ந்து காவல்துறையினர் அங்கு விரைந்தனர். ஒரு சிறிய ரக பள்ளிப் பேருந்து அந்த பகுதியில் மிக மோசமாக ஓட்டப்பட்டதாகவும், அது மெக்டொனால்ட்ஸ் உணவகத்தின் டிரைவ்-த்ரூ பகுதிக்குள் நுழைய முயன்றபோது அங்கிருந்த தடுப்புச் சுவர் (Barrier) மீது மோதி விபத்துக்குள்ளானதாகவும் கூறப்படுகிறது.

சம்பவ இடத்திற்கு வந்த அதிகாரிகள், அந்தப் பேருந்தை வெற்றிகரமாக நிறுத்தி ஓட்டுநரைச் சோதித்தனர். அப்போது அவர் கடும் மதுபோதையில் இருந்ததைக் கண்டறிந்த காவல்துறையினர், எவ்வித எதிர்ப்பும் இன்றி அவரைத் தடுத்துக் காவலில் எடுத்தனர். விசாரணையில், அந்த நபர் North York பகுதியில் உள்ள பேருந்து நிறுத்துமிடத்தை உடைத்து இந்தப் பேருந்தைத் திருடியது தெரியவந்தது. மேலும், அங்கு நிறுத்தி வைக்கப்பட்டிருந்த மற்ற பேருந்துகள் மீதும் மோதி சேதப்படுத்தியதோடு, சில வாகனங்களிலிருந்து ரேடியோக்கள் மற்றும் சாவிகளையும் அவர் திருடியுள்ளதாகப் போலிசார் நம்புகின்றனர்.

கைது செய்யப்பட்ட சமயத்தில் அந்த நபர் காவல்துறையினரிடம் தவறான பெயரைத் கூறி ஏமாற்ற முயன்றுள்ளார். பின்னர் நடத்தப்பட்ட தீவிர விசாரணையில், அவர் நிலையான முகவரி இல்லாத Tanner Jon Davis என்பது அடையாளம் காணப்பட்டது. தற்போது அவர் மீது மதுபோதையில் வாகனம் ஓட்டியது, 5,000 டாலருக்கும் அதிகமான மதிப்புள்ள திருட்டுப் பொருட்களை வைத்திருந்தது, காவல்துறைப் பணியைத் தடுத்தது மற்றும் நன்னடத்தை விதிகளை மீறியது உள்ளிட்ட பல்வேறு குற்றச்சாட்டுகளின் கீழ் வழக்குப்பதிவு செய்யப்பட்டுள்ளது.