Toronto விலங்கியல் பூங்காவில் புதிய பாக்டிரியன் ஒட்டகக் குட்டி பிறப்பு

Toronto நகரில் அமைந்துள்ள புகழ்பெற்ற (Toronto Zoo) விலங்கியல் பூங்காவில், ஒரு புதிய பாக்டிரியன் (Bactrian) வகை ஒட்டகக் குட்டி பிறந்துள்ளதாக பூங்கா நிர்வாகம் மகிழ்ச்சியுடன் அறிவித்துள்ளது. கடந்த வியாழக்கிழமை காலை 7 மணியளவில் பிறந்த இந்த குட்டி, பிறந்த இரண்டு மணி நேரத்திலேயே தனது கால்களால் எழுந்து நின்று அனைவரையும் வியப்பில் ஆழ்த்தியது. தற்போது இந்த ஒட்டகக் குட்டியின் வரவால் பூங்காவிலுள்ள பாக்டிரியன் ஒட்டகங்களின் மொத்த எண்ணிக்கை ஏழாக உயர்ந்துள்ளது.

இந்த வகை ஒட்டகங்கள் தற்போது உலகில் மிக வேகமாக அழிந்து வரும் உயிரினங்களின் பட்டியலில் (Critically Endangered) சேர்க்கப்பட்டுள்ளன. இது குறித்து கருத்து தெரிவித்த Toronto Zoo தலைமை நிர்வாக அதிகாரி (Dolf DeJong), காடுகளில் தற்போது 950-க்கும் குறைவான பாக்டிரியன் ஒட்டகங்களே எஞ்சியுள்ளன என்றும், பெரும்பாலும் அவை மங்கோலியா (Mongolia) மற்றும் சீனா (China) போன்ற தொலைதூரப் பகுதிகளில் காணப்படுவதாகவும் குறிப்பிட்டார். எனவே, இந்த புதிய குட்டியின் பிறப்பு வனவிலங்கு பாதுகாப்பு முயற்சியில் ஒரு மைல்கல்லாகக் கருதப்படுகிறது.

குட்டியின் ஆரோக்கியத்தை உறுதிப்படுத்த பூங்கா ஊழியர்கள் தீவிரமாக கண்காணித்து வருகின்றனர். குட்டியின் தாய் (Suria) மற்றும் மற்றொரு பெண் ஒட்டகமான (Jozy) ஆகியவற்றுடன் இந்த குட்டி தற்போது (Eurasia Wilds) பகுதியில் வசித்து வருகிறது. பிறந்த முதல் மாதம் மிகவும் முக்கியமானது என்பதால், ஆரம்பத்தில் பார்வையாளர்கள் இந்தக் குட்டியைப் பார்ப்பதற்கு சில கட்டுப்பாடுகள் விதிக்கப்படலாம் என பூங்கா நிர்வாகம் தெரிவித்துள்ளது.

சற்று வளர்ந்த பிறகு, இந்த குட்டி அதன் 3 வயதுடைய சகோதரி (Carrie) மற்றும் ஏனைய ஒட்டகங்களான (Tilly), (Jamarcus) ஆகியவற்றுடன் இணைக்கப்படும். இருப்பினும், தந்தை ஒட்டகமான (Zip), தற்காலிகமாக மற்றொரு பகுதியில் தனியாக வைக்கப்பட்டுள்ளது. பூங்காவிற்கு வரும் ஒவ்வொரு வருகையும் இத்தகைய சிறப்பான தருணங்களை உள்ளடக்கியது என்பதை இந்த நிகழ்வு நினைவூட்டுவதாக பூங்கா அதிகாரிகள் தெரிவித்துள்ளனர்.