Canada-வில் கோர விபத்து: ஒரே குடும்பத்தைச் சேர்ந்த ஐந்து உடன்பிறப்புகள் உயிரிழப்பு; Ontario சமூகம் சோகத்தில் மூழ்கியது
Canada-வின் தென்மேற்கு Ontario-வில் நிகழ்ந்த கோர விபத்தில் ஒரே குடும்பத்தைச் சேர்ந்த ஐந்து குழந்தைகள் உயிரிழந்த சம்பவம், அப்பகுதி சமூகத்தை ஆழ்ந்த சோகத்தில் ஆழ்த்தியுள்ளது. விபத்து நடந்த இடத்தில் மலர்களும், விளையாட்டுப் பொருட்களும் குவிக்கப்பட்டு, பொதுமக்கள் அஞ்சலி செலுத்தி வருகின்றனர்.
Waterloo-க்கு வடக்கே உள்ள Mapleton Township பகுதியில், இந்த உடன்பிறப்புகள் தங்கள் குடும்பத்தினருடன் ஒரு வேனில் பயணித்தபோது, அவர்களது வாகனம் SUV ரக வாகனம் ஒன்றுடன் மோதி விபத்துக்குள்ளானது. இந்த விபத்தில் 4, 6, 8, 10 மற்றும் 12 வயதுடைய ஐந்து குழந்தைகளும் சம்பவ இடத்திலேயே உயிரிழந்தனர்.
விபத்துக்குள்ளான வேனில் குழந்தைகளின் பெற்றோர், பாட்டி, 15 மாத கைக்குழந்தை மற்றும் மற்றொரு குடும்ப உறுப்பினர் என மேலும் ஐந்து பேர் பயணித்துள்ளனர். இவ்விபத்தில் தாயார் படுகாயங்களுடன் ஆபத்தான நிலையில் மருத்துவமனையில் அனுமதிக்கப்பட்டுள்ளார். தந்தையின் உடல்நிலை சீராக உள்ளதாகக் கூறப்படுகிறது. 15 மாதக் குழந்தையும் காயமடைந்துள்ளது. பாதிக்கப்பட்ட குடும்பம் Elmira பகுதியைச் சேர்ந்தவர்கள் என காவல்துறையினர் உறுதிப்படுத்தியுள்ளனர்.
SUV வாகனத்தை ஓட்டிச் சென்ற சாரதியும் இரு கால்களிலும் எலும்பு முறிவு ஏற்பட்ட நிலையில் மருத்துவமனையில் சிகிச்சை பெற்று வருகிறார். விபத்துக்கான காரணம் குறித்து காவல்துறையினர் தீவிர விசாரணைகளை மேற்கொண்டு வருகின்றனர்.
முதலுதவிக் குழுவினர் வருவதற்கு முன்பே, அப்பகுதி மக்கள் உடனடியாக சம்பவ இடத்திற்கு விரைந்து வந்து மீட்புப் பணிகளுக்கு உதவ முயன்றதாக Ontario மாகாண காவல்துறை அதிகாரி Matthew Burton தெரிவித்தார். 'பொதுமக்களின் இந்த உதவிக்கு நாங்கள் நன்றி கூறுகிறோம்' எனத் தெரிவித்த அவர், விபத்தை நேரில் கண்டவர்கள் காவல்துறையைத் தொடர்புகொண்டு தகவல் அளிக்குமாறும் கேட்டுக்கொண்டுள்ளார்.
விபத்தில் காயமடைந்த பெரியவர்கள் உடல் ரீதியாகவும், மன ரீதியாகவும் தேறிவர கால அவகாசம் வழங்கப்படும் என்றும், அதன் பின்னரே அவர்களிடம் சம்பவம் குறித்து விரிவான விசாரணை நடத்தப்படும் என்றும் அதிகாரி Burton மேலும் குறிப்பிட்டார்.
இதேவேளை, இந்தத் துயரச் சம்பவத்தை நேரில் கையாண்ட முதலுதவிக் குழுவினரும் மனதளவில் பாதிக்கப்பட்டுள்ளனர். 'பாதிக்கப்பட்ட குடும்பத்தினருக்குத் தேவையான அனைத்து உதவிகளையும் உறுதி செய்வதே எங்களின் முதல் முன்னுரிமை. அதன் பின்னரே, இந்த சம்பவத்தால் பாதிக்கப்பட்ட எங்கள் குழுவினரின் மனநலன் குறித்து கவனம் செலுத்துவோம்' என தீயணைப்பு சேவைகள் இயக்குநர் Chris Harrow தெரிவித்தார்.