Canada: Richmond Hill-ல் வீடு புகுந்து தாக்குதல் - 18 வயது இளைஞர் கைது; மேலும் மூவருக்கு வலைவீச்சு
Canada-வின் Richmond Hill-ல் கடந்த ஏப்ரல் மாதம் வீடு புகுந்து தாக்குதல் நடத்திய சம்பவம் தொடர்பாக 18 வயது இளைஞர் ஒருவர் கைது செய்யப்பட்டுள்ளார். இச்சம்பவத்துடன் தொடர்புடைய மேலும் மூன்று சந்தேக நபர்களை காவல்துறையினர் தீவிரமாகத் தேடி வருகின்றனர்.
York பிராந்திய காவல்துறையின் அறிக்கையின்படி, கடந்த ஏப்ரல் 28 ஆம் தேதி அதிகாலை 4:30 மணியளவில், Hyde Park மற்றும் Red Oak Drives பகுதிக்கு அருகிலுள்ள ஒரு வீட்டின் முன் ஜன்னலை உடைத்து மூன்று சந்தேக நபர்கள் உள்ளே நுழைந்துள்ளனர். அவர்களில் ஒருவர் உலோகப் பொருள் ஒன்றைக் கையில் வைத்திருந்ததாகவும் கூறப்படுகிறது. வீட்டினுள் அத்துமீறி நுழைந்த அந்த கும்பல், வீட்டு உரிமையாளரைத் தாக்கியுள்ளது.
தாக்குதலின் போது சந்தேக நபர்கள் எவ்வித கோரிக்கைகளையும் முன்வைக்கவில்லை என்பது குறிப்பிடத்தக்கது. சம்பவத்தைத் தொடர்ந்து, நான்காவது சந்தேக நபரால் ஓட்டி வரப்பட்ட கருப்பு நிற SUV வாகனத்தில் ஏறி அவர்கள் தப்பிச் சென்றுள்ளனர். இந்தத் தாக்குதலில் வீட்டு உரிமையாளருக்கு லேசான காயங்கள் ஏற்பட்டதாக காவல்துறையினர் உறுதிப்படுத்தியுள்ளனர்.
இச்சம்பவம் தொடர்பான விசாரணைகளின் ஒரு பகுதியாக, கடந்த வாரம் Kitchener-இல் உள்ள ஒரு வீட்டில் அதிகாரிகள் சோதனை நடவடிக்கைகளை மேற்கொண்டனர். இதன்போது, சந்தேக நபர் ஒருவர் கைது செய்யப்பட்டார். அவரிடமிருந்து நிரப்பப்பட்ட துப்பாக்கி ஒன்றும் கைப்பற்றப்பட்டதாகத் தெரிவிக்கப்படுகிறது. மேலும், அவ்விடத்திலிருந்து fentanyl, crack cocaine போன்ற போதைப்பொருட்களையும், ஒரு போலித் துப்பாக்கியையும் காவல்துறையினர் பறிமுதல் செய்துள்ளனர்.
திங்களன்று வெளியிடப்பட்ட செய்திக்குறிப்பில், கைது செய்யப்பட்டவர் Kitchener-ஐச் சேர்ந்த Manav Kotak என அடையாளம் காணப்பட்டுள்ளார். அவர் மீது கொள்ளை, குற்றச் செயலுக்காக மாறுவேடமிட்டமை, தடைசெய்யப்பட்ட துப்பாக்கியை வைத்திருந்தமை, தடைசெய்யப்பட்ட சாதனத்தை வைத்திருந்தமை, துப்பாக்கியைப் பாதுகாப்பற்ற முறையில் சேமித்தமை மற்றும் போதைப்பொருள் கடத்தல் நோக்கத்திற்காக வைத்திருந்தமை ஆகிய குற்றச்சாட்டுகள் பதிவு செய்யப்பட்டுள்ளன.
இதேவேளை, தப்பியோடிய ஏனைய மூன்று சந்தேக நபர்களையும் தேடும் பணிகள் தொடர்வதாகவும், அவர்கள் குறித்த அடையாள விபரங்கள் எதுவும் இதுவரை வெளியிடப்படவில்லை எனவும் காவல்துறையினர் தெரிவித்துள்ளனர்.