Montreal REM திட்டம் விரிவாக்கம்: Griffintown, Bridge-Bonaventure-இல் 2030-க்குள் புதிய ரயில் நிலையங்கள்

கனடாவின் Montreal நகரின் பிரதான பொதுப் போக்குவரத்து வலையமைப்பான Réseau express métropolitain (REM) திட்டத்தின் விரிவாக்கப் பணிகள் அதிகாரப்பூர்வமாகத் தொடங்கியுள்ளன. இதன் கீழ், நகரின் Sud-Ouest பிராந்தியத்தில் இரண்டு புதிய ரயில் நிலையங்கள் அமைக்கப்படவுள்ளன.

Griffintown–Bernard-Landry மற்றும் Bridge-Bonaventure ஆகிய பகுதிகளில் அமையவுள்ள இந்த இரண்டு புதிய நிலையங்களின் கட்டுமானப் பணிகள் 2030-ஆம் ஆண்டுக்குள் நிறைவடையும் என எதிர்பார்க்கப்படுகிறது. கடந்த வெள்ளிக்கிழமை Bill 22 சட்டத்தில் மேற்கொள்ளப்பட்ட திருத்தத்தைத் தொடர்ந்து, இரு நிலையங்களையும் ஒரே நேரத்தில் நிதி ஒதுக்கீடு அங்கீகரிக்கப்பட்டது. இதனை அடுத்து, திட்டமிடல் கட்டம் ஆரம்பிக்கப்பட்டுள்ளதாக CDPQ Infra, Quebec அரசாங்கம் மற்றும் Montreal மாநகர சபை ஆகியன கூட்டாக அறிவித்துள்ளன.

புதிய Griffintown–Bernard-Landry நிலையமானது, Ottawa மற்றும் William தெருக்களுக்கு இடையே உள்ள தெற்கு மேம்பாலத்தில் அமையவுள்ளது. இதன் நுழைவாயில் Dalhousie தெருவில் அமைக்கப்படும். இதேவேளை, Lachine கால்வாயின் தெற்குப் பகுதியில் கட்டப்படவுள்ள Bridge-Bonaventure நிலையத்தின் சரியான இடம் மற்றும் பெயர் குறித்த விபரங்கள் பின்னர் அறிவிக்கப்படும். பல்லாயிரக்கணக்கான புதிய குடியிருப்புகள், பூங்காக்கள் மற்றும் நகர்ப்புற கடற்கரையுடன் புனரமைக்கப்படவுள்ள Wellington Basin பகுதிக்கு இந்த நிலையம் சேவையாற்றும் வகையில் வடிவமைக்கப்பட்டுள்ளது.

CDPQ Infra நிறுவனத்தின் தகவல்படி, இரு நிலையங்களின் திட்டமிடல் மற்றும் கட்டுமானப் பணிகள் சுமார் நான்கு ஆண்டுகள் வரை நீடிக்கும் என மதிப்பிடப்பட்டுள்ளது. இதற்கான ஆயத்தப் பணிகள் வரும் மாதங்களில் ஆரம்பிக்கப்படவுள்ளன. 2028-ஆம் ஆண்டில் கட்டுமானப் பணிகள் முழுவீச்சில் தொடங்கி, 2030-ஆம் ஆண்டில் நிலையங்கள் மக்கள் பயன்பாட்டிற்குத் திறக்கப்படும் என எதிர்பார்க்கப்படுகிறது. திட்டமிடல் கட்டத்தில், கொள்முதல் நடைமுறைகள், தொழில்நுட்ப மற்றும் சுற்றுச்சூழல் ஆய்வுகள், இறுதிச் செலவு மதிப்பீடு உள்ளிட்டவை அடங்கும்.

இது குறித்து Montreal மாநகர மேயர் Soraya Martinez Ferrada வெளியிட்டுள்ள அறிக்கையில், 'Montreal தொடர்ந்து வளர்ச்சியடைந்து வருகிறது. அந்த வளர்ச்சிக்கு ஏற்ப நமது போக்குவரத்து உள்கட்டமைப்பும் விரிவடைய வேண்டும். பயண வசதிகளை மேம்படுத்துவதன் மூலமும், புதிய வீட்டுத்திட்டங்கள் மற்றும் பொருளாதார நடவடிக்கைகளுக்கு ஆதரவளிப்பதன் மூலமும், இந்த நிலையங்கள் மாநகரத்தை மேலும் அணுகக்கூடியதாகவும், இணைக்கப்பட்டதாகவும், கவர்ச்சிகரமானதாகவும் மாற்ற உதவும்' எனக் குறிப்பிட்டுள்ளார்.

இந்த Sud-Ouest REM திட்டத்திற்காக Quebec மாகாண அரசாங்கம் 25 மில்லியன் டாலர்களையும், கனடாவின் மத்திய அரசாங்கம் 250 மில்லியன் டாலர்களையும் வழங்கியுள்ளன. இதன்மூலம், REM திட்டத்திற்கான Ottawa-வின் மொத்தப் பங்களிப்பு 1.83 பில்லியன் டாலர்களாக அதிகரித்துள்ளது. இறுதி கட்டுமானச் செலவுகளைப் பொறுத்து தங்களது பங்களிப்பு உறுதி செய்யப்படும் என CDPQ Infra மேலும் தெரிவித்துள்ளது.