Montreal Walmart-இல் பட்டப்பகலில் கொடூரம்: கத்திக் குத்துத் தாக்குதலில் 22 வயது இளைஞர் படுகொலை!

கனடாவின் Montreal நகரில், மக்கள் நடமாட்டம் மிகுந்த Walmart அங்காடியில் செவ்வாய்க்கிழமை பிற்பகல் 22 வயது இளைஞர் ஒருவர் கத்தியால் குத்திக் கொல்லப்பட்ட சம்பவம் பெரும் அதிர்ச்சியை ஏற்படுத்தியுள்ளது.

Montreal North பகுதியில், Henri-Bourassa மற்றும் Lacordaire பவுல்வர்டுகள் சந்திக்கும் இடத்திற்கு அருகிலுள்ள Walmart-இல் உள்ளூர் நேரப்படி மாலை 4 மணியளவில் இந்தத் தாக்குதல் இடம்பெற்றுள்ளது. தகவலறிந்து Montreal காவல்துறையினர் (SPVM) சம்பவ இடத்திற்கு உடனடியாக விரைந்தனர்.

காவல்துறை செய்தித் தொடர்பாளர் Manuel Couture அளித்த தகவலின்படி, பாதிக்கப்பட்ட இளைஞருக்கும் மற்றொரு குழுவினருக்கும் இடையே ஏற்பட்ட வாக்குவாதம் கைகலப்பாக மாறியுள்ளது. அப்போது, கூரிய ஆயுதத்தால் இளைஞரின் உடலின் மேற்பகுதியில் குத்தப்பட்டுள்ளது. தாக்குதலைத் தொடர்ந்து, சந்தேக நபர்கள் அங்கிருந்து தப்பிச் சென்றுள்ளனர்.

சம்பவ இடத்திற்கு அதிகாரிகள் சென்றபோது, பாதிக்கப்பட்டவர் உயிருக்கு ஆபத்தான நிலையில் சுயநினைவின்றி காணப்பட்டார். உடனடியாக மருத்துவமனைக்கு கொண்டு செல்லப்பட்ட போதிலும், அவர் சிகிச்சை பலனின்றி உயிரிழந்ததாக பின்னர் உறுதி செய்யப்பட்டது.

இந்தக் கொலைச் சம்பவம் தொடர்பாக இதுவரை எவரும் கைது செய்யப்படவில்லை. தாக்குதலுக்கான காரணம் என்னவென்பது குறித்து இதுவரை தெளிவாகத் தெரியவரவில்லை. தப்பியோடிய சந்தேக நபர்களைக் கண்டுபிடிக்க காவல்துறையினர் தீவிர தேடுதல் நடவடிக்கையை மேற்கொண்டுள்ளதுடன், பொதுமக்களின் உதவியையும் கோரியுள்ளனர்.

இந்தச் சம்பவம், Montreal நகரில் இந்த ஆண்டில் பதிவாகும் ஒன்பதாவது படுகொலையாகும். இவ்வழக்கை தற்போது முக்கிய குற்றப்பிரிவுப் புலனாய்வாளர்கள் விசாரித்து வருகின்றனர்.